گالولك نساك وصدگتهم ليش ..؟
وانت الحذرتني وگتلي عدوانك
أشصار .. وشختلف ..؟ ، وانگلبت الآيات
بيهم صدگت .. وأنطيت برهانك
ذبولك طعم من حچوا عني وياك ..
حچايه وبالچذب .. بس باگوا لسانك
ما حاجه امنگلك آنه ماناسيك ..
لأن تعرف ابگلبي لهسه ماخانك
خوانك صفوا ..؟؟
لا والنبي ايغشوك .. مثل خوان يوسف ذوله خوانك
ولك عدوان صدگ .. آنه اخاف عليك ..
يمشوك ابدرب ويضيع عنوانك
تعال وخل أذَكرك ماضي الك وياي ..
غفت چم مره روحي ابين ذرعانك ..؟
وتعال وخل أَذَكرك .. يمكن انت انسيت ..
شم عطر الوفه تلكاه ابقمصانك
وتعال وخل أَشَوفك بالگلب نيشان ..
من توصل لگلبي اتشوف نيشانك
ماذكرك بيه ولا حرف بالشوگ ..؟؟
ولا طبعات چفي الفوگ بيبانك ..؟؟